2 prensip tout antreprenè dwe konnen avan yon lanse yon biznis
Yon antreprenè se yon machann solisyon. Chak pwoblèm se yon opòtinite pou tout
vrè antreprenè paske yo konnen si yo rive jwenn solisyon an yo ap kapab vann li
e touche benefis pou sa. Se konsa sistèm kapitalis la anrichi antreprenè yo e
li fasilite lavi konsomatè yo. Se gayan-gayan.
Nou pa bezwen louvri gwo liv ni fè gwo bout tonton rechèch pou nou konprann
gen gwo antreprenè e gen ti antreprenè tou. Ok, kounya ou ka mande m kisa ki
distenge yo ?
Sa ki distenge yo se kalite solisyon yo ofri an.
Ou pa janm mande tèt ou kòman mond lan t ap ye si Bill Gates pa t fonde Microsoft ?
Donk nou wè tout solisyon yo pa gen
menm pwa. E sa mennen nou pou poze
tèt nou yon dezyèm kesyon.
A KONBYEN MOUN YON ANTREPRENÈ KA VANN YON SOLISYON ?
La ankò, Sa depann de solisyon an. Tout solisyon pa menm, yo pa gen menm enpak.
Donk, tout solisyon pa gen menm pri. Plis enpak vle di plis kòb.
Lè mwen di enpak mwen vle sèlman di konbyen lajan solisyon an kapab jenere.
Gen 2 wout yon antreprenè kapab pran pou li jenere enpak.
# 1 Echèl
Echèl la se kantite lavi moun yon antreprenè kapab amelyore avèk yon
solisyon.
Pa egzanp si ou louvri yon stand pou w vann sandwich bò lakay
ou. Ou ap gen yon ti enpak tou zuilit. Yon enpak lokal. Li bon. Men li
piti. Annou gade yon lòt egzanp ak yon pi gwo enpak.
Tankou nan tan lontan moun te konn itilize
cheval pou deplasman yo. Sa ka parèt kòm yon solisyon pou pwoblèm deplasman an men
se pa vre. Cheval yo pa ka fè wout lwen akoz fatig, grangou ak lòt konplikasyon
fizyolojik.
Mond lan te ka pa t menm rann li kont… Men Pwoblèm lan te la. Se pou rezon
sa lè Henry Ford pwopoze otomobil Model T nan lane 1908, yon machin ki pa chè ke
tout moun te ka achte, tout mond lan te fè va sou machin lan e li te vann
tankou pate cho. Paske moun yo te swaf solisyon.
Selon wikipedia, Ford Model T se machin ki kreye plis sansayon pandan tout
20èm Syèk la. Ford vann plis pase 15 milyon otomobil nan grenn modèl sa, e jiska
lane 2012 se te 8èm nan 10 modèl machin ki vann plis nan monn lan.
Donk si w se antreprenè, travay ou se vann solisyon. Men lè w vle rezoud yon
pwoblèm, mande tèt ou konbyen moun solisyon an ap entèrese. Se prensip Echèl.
Echèl la vle di konbyen moun ou ka touche. Echèl se gwo chif. Se echèl ak
gwo chif ki mennen nan enpak. Pou rive fè yon milyon dola fòk ou touche yon
milyon moun.
Vize gran! Adopte yon vizyon nasyonal e/ou mondyal.
Men kèk kesyon ou ka poze tèt ou pou w konnen si biznis ou an oubyen
solisyon ou ap vann lan ofri w yon bon echèl ?
-
Eske
biznis lan gen potansyalite pou li grandi san limit, tankou èske benefis li ka pase
de 20 mil a milyon a nenpòt ki moman?
-
Eske
biznis lan ka touche yon santèn moun oubyen yon milyon ?
-
Eske
mwen ka gen kliyan nan tout mond lan oubyen nan peyi m sèlman oubyen bò lakay
mwen sèlman ?
-
Konbyen inite m ka vann nan pwodui mwen an, 100
oubyen 1 milyon?
Pran san w pou w reponn kesyon sa
yo. Si repons ou yo pozitif, konnen
solisyon w lan kapab gen gwo enpak. E petèt nan ane ki ap vini yo non w ap site
pami gran antreprenè yo.
#2 Mayitid
Se pa tout lè echèl la posib. Erezman gen yon lòt wout ki mennen nan
enpak san w pa bezwen touche yon milyon moun. Se prensip mayitid.
Mayitid lan se lè benefis ou sou
chak grenn pwodui tèlman enpòtan, li vin pa nesesè pou w touche anpil moun. Lwa
sa aplike pou pwodui liks oubyen ki atache ak prestij.
Selon CNN, lamborghini vann sèlman 8205 machin pou lane 2019 lan nan tout
mond lan. Sa ka parèt yon ti kras nan je w pa rapò ak Toyota
ki vann 10.7 milyon machin soti janvye rive desanm 2019. Sepandan, PDG konpayi
Lamborghini an, Stefano Domenicali,
montre li enkyè akoz li estime twòp machin vann nan yon sèl grenn ane.
Nan entèvyou li bay CNN, li deklare yo ap pran yon poz lè vant yo rive nan
yon sèten nivo paske yo pa vle pou mak la pèdi repitasyon l.
Lòt detay ou dwe konnen, yon Lamborghini vann an mwayèn ant 200 mil a 500
mil USD alòske yon Toyota vann ant 15 mil a 30 mil. Sa montre konpayi Lamborgini pa mize
sou echèl (anpil moun) men li mize sou mayitid (benefis sou chak grenn pwodui).
Pa gen youn nan strateji sa yo ki pi bon, tou 2 kapab fè
gwo enpak. Chwa youn oubyen lòt depann
de pèsonalite antreprenè ak inovasyon li ofri an. Plis solisyon an enpoze l, plis
konsomatè yo ap pare pou peye pou li.
Donaldson Velny
Jounalis Siksè,
Motivatè
P.S. : vtttrrrrrrrrrrrrrreereSi
w renmen atik sa, m ap envite w abone ak chanèl YouTube mwen pou w toujou rete
motive, Klike
la.
Photo by Daniel Bosse on Unsplash
Commentaires
Enregistrer un commentaire